可能大家都會聽過沙漠玫瑰呢種植物, 沙漠風情

但係應該大部份人都未聽過沙漠玫瑰石呢種結晶,因為多數你都只會響沙漠地帶揾到佢地,所以就等我嚟介紹下佢啦!

其實佢係硫酸鈣或者硫酸鋇,再加上沙粒而形成嘅結晶。沙漠玫瑰石結晶嘅形態都幾特別,所以呢個名係真係好啱佢架!

響欣賞佢嘅美態之餘,如果想知道更加多有關呢朵花嘅嘢,就快啲睇埋落去啦!尋補Tutor Circle介紹下沙漠玫瑰。


沙漠玫瑰石?乜嘢嚟架?

 

沙漠

 

先此聲明:筆者唔係咩專家,只係響突尼西亞去旅行嘅時候,咁啱見到呢種比其他靚啲,形狀又特別啲嘅石,所以先會對佢有興趣,仲會上網研究下呢啲究竟係咩嚟。

相信冇乜香港人會識呢種石頭,但係響盛產呢種石嘅突尼西亞,你會見到周街都係呢啲石,某啲店鋪門口都會擺幾舊響度,街邊都幾多小販會賣呢啲石頭,由得一個乒乓波咁大去到條腰咁高嘅都有,價錢仲要好平添。

 

沙漠

 

咁佢究竟係咩嚟架?

沙漠玫瑰石呢個名以石頭嚟講係咪都幾優美呢!Erm…其實嚴格嚟講佢係晶體嚟,即係好似平時化學書見到嗰啲硫酸銅晶體咁樣,都係響飽和溶液入面凝結出嚟嘅固體。(冇讀化學嘅同學識唔識呢?)名符其實地,佢嘅形狀就好似玫瑰咁有好多花瓣,加上呢種晶體係響沙漠度出世架,所以就有呢個名啦。

通常啲人會簡稱佢做沙漠玫瑰,但係唔好將佢同真正嘅沙漠玫瑰撈亂啊!

 

沙漠

 

咁黃,都唔似平時見到嘅晶體嘅?

雖然話係晶體,但係佢就一啲都唔晶瑩剔透,仲成日都成身沙添!

其實佢主要嘅成份係石膏同沙,石膏,亦即係硫酸鈣,本身都可以結出好多種唔同嘅晶體嘅,而呢一種結構就係叫玫瑰花形。

咁佢地係點樣出世架呢?沙漠玫瑰石通常都係響又乾又多沙嘅環境下生成,再加上大量嘅石膏。乾燥會令到水份蒸發,咁先可以令溶咗響水入面嘅石膏達致飽和狀態,然後經歷咗長年累月嘅水份蒸發之後,就會形成一粒粒獨一無二嘅結晶啦!

呢啲條件響香港係唔會揾到,而響北非、又位處撒哈拉沙漠邊緣嘅突尼西亞,就滿足到呢啲條件啦!

正正因為佢地周圍都係沙,自然啲沙響結晶嘅時候,就會融入埋響佢地嘅花瓣入面,令到佢地黃黃地色啦。

 

沙漠

 

除咗石膏之外,沙漠玫瑰石仲可以係由硫酸鋇生成嘅,不過響突尼西亞就比較少,主要都係石膏。而兩個嘅形狀都會有少少分別,

如果係硫酸鋇嘅話啲花瓣會大塊啲同厚啲,條邊都會冇石膏嘅咁尖,個表面亦都粗糙啲同埋黑啲,成舊結晶嘅形態都會冇咁精緻,所以筆者就鍾意由石膏生成嗰種多啲啦!

雖然係硫酸鋇嘅話,會比較多花瓣差唔多互相水平,所以形狀就會比較貼近真實嘅玫瑰多啲,反而石膏就會冇咁似樣啦。

 

沙漠風情

 


咁佢地點解會係咁嘅形狀嘅?

佢地結晶嘅時候會以一塊塊圓形同埋扁平,好似花瓣咁樣嘅形狀為單位,每塊花瓣都係由內向外生嘅,且每塊都會向唔同方向生長,大細亦都相差好遠,所以就會生到好似幅圖見到嘅咁不規則啦!

因為佢地嘅不規則,所以唔係每一舊嘅形態都會咁靚。筆者去旅行諗住買舊嘅時候,都落咗唔少眼力去揀架!

係咪得突尼西亞先有架咋?

除咗突尼西亞之外,好多響沙漠或者沙漠周圍嘅國家都會揾到佢地嘅蹤影,例如同樣係響非洲嘅埃及、摩洛哥,中東嘅阿聯酋、卡塔爾,甚至係美國同澳洲等等都有架!不過唔同地方嘅氣候、水土唔同,結晶生成出嚟嘅沙漠玫瑰都自然會唔同。講咗咁耐,唔知你又覺得佢靚唔靚呢?

圖片來源:
https://miraimages.photoshelter.com/image/I0000mFOqM36deeg
http://blog.xuite.net/ct731023/twblog/173822549-%E6%B2%99%E6%BC%A0%E7%8E%AB%E7%91%B0%E7%99%BE%E8%8A%B1%E7%88%AD%E8%B1%94
https://tw.freeimages.com/premium/gips-desert-rose-crystal-gypsum-crystal-on-white-background-166025
http://kasugachan.blogspot.hk/2011/06/blog-post_08.html
https://www.pinterest.com/pin/439452876118657749/

 

此文章純屬 Blogger 個人分享,並不代表本網誌立場。

 

想追返學校進度?Tutor Circle尋補有超過10,000個三大導師,即日幫你搵一個合適既導師!

想搵 一個合適既私補老師

 

DSE讀得咁辛苦,想活用知識黎賺下外快?

想搵 好多好多私補學生

緊貼尋補 BlogFacebook  Instagram,尋補?Tutor Circle

 

Z世代 修辭手法 Ocamp
英文補習 上莊 中文補習 議論文
slp smaple 補習網 數學補習
大學五件事 綜合格式

 

Comments