其實香港十八區,區區都有名物架!荃灣區除左有大量美食,包括港人至愛既米線同雞煲,仲有大量好玩既娛樂熱點,啱晒一家大細黎玩,男女朋友約會都啱唔洗局限係油尖旺呢啲例牌景點啦!Tutor Circle尋補今日就黎同大家搜羅本地荃灣區好食好玩既推薦熱點,總結左區內六個玩樂好去處比大家參考,啱晒鐘意嘢食嘢飲既你!

1. 唯一雲貴川風味

香港人唔知點解真係勁中意食米線,搞到雲南酸辣米線開到成行成市,一街都係,係譚仔三哥雲桂香呢啲連鎖米線店愈開愈多,受人追捧嘅時候,有網民就話如果食過荃灣嘅唯一雲貴川風味,絕對唔會想再去食返上面果啲連鎖店,就知道佢有幾好味啦。中意食辣嘅朋友一定唔可以錯過,因為佢嘅勁辣湯底係做得非常之出色,令人一試上癮!

荃灣 美食

(圖片來源自網上)

 

2. 18樓雞煲

愛吃雞煲嘅人士,愛吃辣嘅人士,應該都有機會聽過呢間雞煲。平時成班人聚都少不免去食雞煲,跟手打個邊爐,為左方便通常都係旺角食,但呢間係荃灣嘅雞煲就真係唔試唔得。店主親自調配嘅統四川麻辣雞煲醬,同出面嘅唔同,18樓嘅雞煲夠麻夠香,而且雞肉亦都十分嫩滑,雖然辣但都令人想食完一舊再一舊。食晒啲雞仲可以落熬足十幾個鐘嘅豬骨湯底變打邊爐,必叫花膠任食,真係好抵食啊!

荃灣 美食

(圖片來源自網上)

 

3. 手調飲品集中地

黑糖珍珠鮮奶大熱,個個都要排隊買返杯打卡,最誇張見過有人一日一杯丫,唔通佢目標係飲晒呢個世界嘅黑糖珍珠鮮奶?!荃灣嘅路德圍一向係小食熱點,前排仲進駐左數間大熱手調飲品店,包括老虎堂、良辰吉時、東喜茶、清玉等,一次過滿足你幾個打卡願望。而且唔似得旺角、銅鑼灣呢啲地方大排長龍,慳返唔少時間又可以去排第二杯喇~

荃灣 美食

 

4. 荃灣海濱公園

海濱長廊一向係朋友、情侶約會嘅好地方,荃灣海濱公園入面嘅海濱長廊都唔例外,黃昏時分睇到醉人嘅日落,而且荃灣海濱長廊嘅最大特色就係可以睇到汀九橋,欣賞晚霞嘅時候更添浪漫氣氛。另外,公園入面都有片大草地,可以一家大細去野餐,近近地交通就方便就可以係草地度野餐喇,離西鐵站只係3個字嘅路程咋!

荃灣 美食

(圖片來源自網上)

 

5. 隱世靚沙灘

放假去海邊吹下海風睇下海簡直係人間樂事,見到個海我就咩煩惱都冇晒喇~但係假日去沙灘好容易要同人逼,人山人海咩mood都冇晒啦。去沙灘唔一定去港島,淺水灣深水灣呢啲熱門沙灘嘅,係成個荃灣區都有唔少沙灘可以選擇,少人啲又乾淨啲。馬灣東灣泳灘、汀九灣泳灘、近水灣泳灘、海美灣泳灘、釣魚灣泳灘、麗都灣泳灘,呢幾個泳灘都可以望到汀九橋架!

荃灣 美食

(圖片來源自網上)

 

6. 迪欣湖活動中心

我諗唔講都唔知欣澳都係屬於荃灣區入面架,係迪士尼呢個咁夢幻嘅童話世界隔離,都有一個好似世外桃源嘅地方,一大片草地,波如平鏡嘅湖,仲有一棵「美人樹」盛放。「美人樹」係一棵絲木棉,樹葉較細、樹型優美,花開嘅時候就好似一棵粉紅色嘅樹咁,好似身處童話世界裡面啊。成個活動中心都有唔少嘅打卡位,最岩約埋閨蜜一齊享受一個悠閒嘅下午。

荃灣 美食

(圖片來源自網上)

 

假日想抖下,唔一定要離開香港出走出旅行嘅。香港你都未去晒,或者你有機會搵到屬於自己嘅一片小天地呢!

今次同大家去左荃灣區先!下次我地第二個區再見~

 

【延伸閱讀】【行勻十八區・好玩好食大搜羅】– 沙田區篇

【延伸閱讀】【行勻十八區・好玩好食大搜羅】– 北區篇

 

此文章純屬 Blogger 個人分享,並不代表本網誌立場。

 

想追返學校進度?Tutor Circle尋補有超過10,000個三大導師,即日幫你搵一個合適既導師!

想搵 一個合適既私補老師

 

DSE讀得咁辛苦,想活用知識黎賺下外快?

想搵 好多好多私補學生

緊貼尋補 BlogFacebook  Instagram,尋補?Tutor Circle

 

Z世代 修辭手法 Ocamp
英文補習 上莊 中文補習 議論文
slp smaple 補習網 數學補習
大學五件事 綜合格式

 

Comments