日日都去旺角、尖沙咀、銅鑼灣,人又多車又多,仲要黎黎去去都係果啲野,真係你唔悶我都悶啦!想同朋友仔,男/女朋友仔出去玩又想有啲新意,呢個系列一於帶你走入冷門啲嘅約會地點,重新探索香港。其實香港十八區,區區都有名物架!而家就即刻起身換衫,拎埋個袋,今日就同Tutor Circle尋補一齊走進沙田區睇下有咩玩啦!

 

1. 陳根記大排檔

招牌菜wasabi手撕雞應該好多人都聽過,就係出自呢個位於沙田禾輋邨嘅大排檔——陳根記。但係有消息指係今年嘅12月中旬就會由禾輋邨搬去石門,到時有馬鐵直達,交通方便得多!以往係禾輋邨交通冇咁方便,要去到火炭站行15分鐘先到,又或者係沙田再轉小巴入去禾輋。陳根記嘅wasabi手撕雞同埋芒果一口脆街知巷聞,問沙田友一定冇人唔識!

沙田 美食

(圖片來源自網上)

 

2. 大圍手撕雞腸粉

沙田區唔係淨係得沙田嘅,位於大圍嘅華輝小食,就因為手撕雞腸粉出晒名。小店堅持使用石磨芝麻醬,麻醬香,腸粉滑,配埋手撕雞增添口感,三樣野係口中混合,真係人間美食丫!唔怪得之要大排長龍啦!中意食辣嘅朋友都可以加辣,最辣去到地獄辣啊,你夠唔夠膽挑戰?個人認為加少少辣有啲刺激感仲正啊!位置就係大圍站A出口一出直行就會見到架喇,一啲都唔難搵。

沙田 美食

(圖片來源自網上)

 

3. 恆安燒賣

恆安呢個地方可能對唔係住沙田嘅人黎講比較陌生,恆安係馬鐵線嘅其中一個站,近馬鞍山果邊。至於點解要特登介紹大家入到去恆安邨呢,就係因為呢樣沙田名物喇——手造魚肉燒賣。燒賣周街都有得食,為咩事要特登入到黎恆安食呢?呢間小食店叫做「三寶皇」,係係恆安街市入面嘅,每日人手包魚肉燒賣,魚肉鮮味夠香,咬落去仲好彈牙tim,唔怪得之有人山長水遠都要入去一嘗呢個燒賣啊!

 

4. 瀝源橋

講起沙田,不得不提嘅一定係果條臭到街知巷聞嘅城門河,城門河貫通整個沙田,上面有好多座橋方便居民來往兩岸。要講呢條橋有咩特別,佢連接住沙田鐵路站,新城市廣場同河對面嘅乙明村,居民出出入入都靠佢,佢都唔知陪伴左沙田友度過幾多喜怒哀樂。瀝源橋嘅設計好有中國風味,純白色建築,橋底由幾個拱形拼埋一齊,兩端以斜坡設計,仲係一個睇落嘅好地方tim。

沙田 美食

(圖片來源自網上)

 

5. 香港文化博物館

大家唔知以為香港嘅博物館全部都集中左係尖沙咀,係沙田市中心都有一個文化博物館,而前幾年興起嘅打卡熱點——香港鐵路博物館,其實係佢嘅分館之一黎架。文化博物館嘅常設展覽係免費開放比公眾入場嘅,包括金庸館、兒童探知館、粵劇文物館、徐展堂中國藝術館同趙少昂藝術館,想認識下香港嘅文化歷史,過一個有深度嘅週末,文化博物館就係一個不錯嘅選擇喇。

沙田 美食

(圖片來源自網上)

 

6. 彭福公園

沙田嘅公園,我諗最出名嘅應該都係位於沙田新城市廣場嘅史勞比公園,但除此之外,彭福公園都係一個休憩嘅好地方。彭福公園係馬場附近,有一大片嘅草地,好寬敞架,仲觀迎寵物入內tim,超級適合一家大細一齊黎玩,或者係近年十分流行嘅野餐都好適合架。一大片綠油油嘅草地任影唔嬲, 係時候去親親大自然喇。

沙田 美食

(圖片來源自網上)

 

假日想抖下,唔一定要離開香港出走出旅行嘅。香港你都未去晒,或者你有機會搵到屬於自己嘅一片小天地呢!

今次同大家去左沙田區先!下次我地第二個區再見~

 

【延伸閱讀】長洲一日遊 | 朝聖休閒Relax全攻略

【延伸閱讀】【行勻十八區・好玩好食大搜羅】– 北區篇

*此文章純屬 Blogger 個人分享,並不代表本網誌立場。

尋補?Tutor Circle!

其他人還看了……

中學排名  呈分試  升中面試  英文補習

大學收分  Jupas  副學士  DSE筆記

大學五件事  私補價錢  Ocamp  暑期工

生日好去處  IQ題  任坐Cafe

👇🏻 緊貼最新資訊!

Tutor Circle
Facebook15k
Instagram41k
LinkedIn
Youtube
Telegram

留言