「丫我又失眠喇!」失眠,並唔等如訓唔著,間唔中一兩晚訓唔著唔算係失眠架,係正常嘅現象黎。好難訓得著,或者就算訓左都訓唔到耐,而且呢個情況持續幾日至一個禮拜,先可以稱之為失眠。日日都係咁樣失眠嘅話,會令到日頭冇精神,而且脾氣都會好差,同埋導致集中力不足。長期失眠仲會引致其他健康問題,例如精神問題、睡眠障礙等,所以有失眠問題嘅朋友一定要病向淺中醫,以下Tutor Circle 尋補就睇下呢幾個方法可唔可以幫到你啦。

1. 飲蜂蜜牛奶

飲熱牛奶可以幫助睡眠我諗係人都知,但要將熱牛奶嘅作用發揮到淋漓盡致,效果更上一層樓,秘訣就再於加入蜂蜜。要知道點解蜂蜜牛奶有用,首先我地要認識「色胺酸」呢種物質,佢又被稱為天然嘅助眠劑,可以安定神經同埋舒緩各種緊張嘅情緒,而我地正正就可以係牛奶裡面攝取色胺酸,而蜂蜜嘅效用就係佢嘅糖分可以幫助色胺酸快啲進入腦部,從而釋放睡意。

失眠 解決 - milk
蜂蜜同牛奶中嘅天然物質可以幫助釋放睡意。

 

2. 食香蕉

唔知大家有冇聽過食蕉會令人開心呢?因為香蕉入面有另一種氨基酸,叫做γ-氨基丁酸(簡稱GABA),可以抑制中樞神經嘅過度興奮,促進放鬆,幫助你進入睡眠狀態。而且香蕉有豐富嘅澱粉質同纖維,飽腹嘅感覺亦都會令人產生睡意。

失眠 解決 - banana
香蕉中嘅氨基酸可以協助放鬆,飽腹感都會增加睡意。

 

3. 聽自然音樂

臨訓前聽住啲音樂入睡係唔錯嘅方法,因為音樂亦都有放鬆神經,舒緩情緒嘅效用,但有時聽到自己中意嘅歌,又會忍唔住跟著音樂搖擺,唔中意嘅歌又唔想聽。解決方法黎喇,就係聽自然音樂,即係一啲自然嘅聲音,例如係雨水聲、海浪聲、叢林入面嘅雀鳥聲。跟番個人喜好揀中意嘅聲音,聽啲悅耳嘅聲音,融入大自然,都會好訓啲架!

失眠 解決 - sea
聽下大自然嘅聲音,例如雨聲、海浪聲等等都會令腦部放鬆。

 

4. 睡前熱水泡腳

訓教前可以用熱水浸腳浸10-15分鐘,或者沖番個熱水涼,改善血液循環,可以容易啲入睡。呢個方法允其適用於手腳長期冰涼,夏天對腳都係凍冰冰嘅女仔,人皮膚嘅溫度上升暖笠笠個人都會好訓啲,冇咁易醒。

失眠 解決 - foot
熱水浸腳促進血液循環,個身暖笠笠都好訓啲。

 

5. 腹式呼吸法

如果有玩開瑜珈嘅朋友相信對腹式呼吸法都唔會陌生,腹式呼吸法對改善睡眠最大嘅用處都係放鬆緊張心情。正確嘅腹式呼吸法係係吸氣嘅時候橫隔膜下降,使你嘅肚皮膨脹;呼氣嘅時候相反,咁樣會幫身體吸入多啲氧氣,排出二氧化碳。腹式呼吸法再配合埋4-7-8嘅節奏,即深呼吸4秒,跟住閉氣7秒,再慢慢呼氣8秒,據聞60秒內就訓得著!

平時做下運動,夜晚都會好訓啲架!

新手練跑常見謬誤

失眠 解決 - breathe
腹式呼吸法令人嘅集中力放係呼吸上面,慢慢進入放空狀態。

 

6. 遠離電子產品

呢個係好多都市人嘅通病,平時生活咁忙碌,臨訓前可以碌下手機已經係最大嘅娛樂。但臨訓前不斷睇住手機、平板等呢啲電子產品,佢地嘅藍光會刺激腦部,令你嘅腦部持續一段時間處於興奮狀態。所以有專家建議臨訓前嘅一個鐘頭都唔好接觸電子產品,令腦部冷靜落黎。各位失緊眠訓唔著都好,千祈唔好嫌悶走去撳電話,只要令你越黎越冇睡意。

低頭族電子產品上癮好難放低部手機?有個App可以幫你遠離電話!

有咩App咁巴閉?

失眠 解決 - 3C
電子產品嘅藍光會令腦部處於興奮狀態,訓極都訓唔著。

 

7. 點香薰助眠

香薰精油有唔同嘅功效,當中亦不乏一啲可以抒緩疲勞同埋幫助入睡嘅香味,例如薰衣草或天竺葵精油可以抒緩過度勞累;而花梨木或乳香精油就可以撫平焦慮混亂嘅思緒,緩解身心靈的緊繃。臨訓前點香薰唔單止可以令你易啲訓著,一直點著黎訓覺亦可以提升睡眠質素,訓得冧啲。

失眠 解決 - fregrance
香薰精油有唔同嘅功用,幫助入睡之餘仲可以提升睡眠質素。

 

8. 拉筋

做左成日野,或者返左成日學一定會覺得啲肌肉緊晒,成個人都攰,就算攤左落張床度都仲係覺得成身肌肉痠痛,非常不適。呢個時候就要起一起身拉拉筋,做一啲簡單嘅動作放鬆下手、腳、頸、背嘅肌肉。只係一啲好容易,而且係床上面都做到嘅拉筋動作,就可以放鬆返身體,訓到訓得舒服啲啊!

跳舞都好講求柔軟度,拉得筋多學跳舞都易上手啲!

跳舞唔一定要由細學起

失眠 解決 - stretch
睡前拉筋可以放鬆疲勞嘅肌肉,訓都訓得好啲。

 

9. 構想當晚的夢境

訓唔著嘅時候,合埋眼開始思考下今晚想發嘅夢,一般都係會發啲開心嘅夢嘅,呢個過程可以令你忘卻今日遇過嘅不愉快嘅事同埋負面嘅情緒。如果諗諗下突然諗到啲不合理嘅野都唔好去執著,跟住意識流走,太執著係要修正或者趕走唔合理嘅思緒嘅話只會令人鑽左牛角尖,不斷塞左係果個位。

失眠 解決 - dream
臨訓前發下夢,諗下啲開心嘅野,忘記一日裡面發生嘅唔好嘅事。

 

10. 數數字

數綿羊已經out晒架喇,跟住就唔work仲愈數愈精神tim。而家要數,就數重複嘅數字,好似重複默念1,或者重複數123,123,123咁呢啲唔洗用腦嘅數字,幫助個腦慢慢「熄機」,慢慢令腦袋放空,進入準備好睡眠嘅狀態。

失眠 解決 - number
數綿羊愈數愈精神,重複地數數字就可以幫個腦慢慢熄機。

 

總結

如果你有長期失眠嘅問題,而且嚴重影響到你嘅生活,建議都係盡早去諮詢醫生嘅專業意見喇~

 

【延伸閱讀】黑眼圈成因 — 唔一定係瞓唔好??

【延伸閱讀】睡眠 – 令學習事半功倍的秘密武器

 

此文章純屬 Blogger 個人分享,並不代表本網誌立場。

 

想追返學校進度?Tutor Circle尋補有超過35,000個三大導師,最快兩小時幫你搵一個優秀既上門導師!

想搵 一個合適既私補老師

DSE讀得咁辛苦,想活用知識黎賺下外快?

想搵 好多好多私補學生

緊貼尋補 BlogFacebookInstagram,想尋補?搵Tutor Circle

 

Z世代 修辭手法 Ocamp
英文補習 上莊 中文補習 議論文
slp smaple 補習網 數學補習
大學五件事 綜合格式