唔少大學生係課餘既時間都想搵返份補習part time賺下外快,因為人工高工時短,而且時間、地點都相對自由。就著私補呢個話題,今次呢篇文「私補老師攻略」主要想講下私補老師點樣可以準備好第一堂,係家長或者學生心目中留返個好印象,增加家長搵你長補嘅機會。Tutor Circle 尋補 希望呢篇文可以幫助到所有第一次幫人補習既老師,或者已經補咗好多次嘅導師,可以輕鬆面對補習第一堂啦!

私補首堂前準備

1.同家長/學生事前溝通好

第一次補習 - 怪獸家長的行為特徵
同家長或者學生溝通好晒,可以貼近雙方嘅期望。(圖片來源:香港電台)

呢一點好重要!好重要!好重要!而且好容易比人忽略!好多補習老師都以為攞咗家長或者學生電話之後,淨係同佢夾好時間咁就算,其實仲有好多嘢你要了解清楚,有啲家長同學生冇同你講清楚要啲咩,而你又唔主動問,咁樣就有機會出現誤會,大大影響佢哋對你嘅觀感,以下整理咗一啲問題去了解家長或者學生嘅需要:

  • 教材係要導師準備定係學生自備?
  • 課堂節奏可以去得快啲定係要慢慢講?
  • 程度暫時係level幾/全級排第幾?
  • 目標係想升到level幾/級排名升到幾多?
  • 讀邊間中學?中中定係英中?
  • 學生而家教到咩topics?
  • 仲有幾耐要考試?
  • 想溫返啲舊野打好個底定係去學新野?
  • 學生嘅性格係點?(呢個問家長會比較好,問返學生自己有啲奇怪⋯⋯)
  • 每隔幾耐交一次學費?(即堂清或每星期清或月結都可以。建議不要預收學費,因為當大家關係未係好深厚時,或會帶來反感。)
  • 有冇後備時間可以約到?(以防有啲突發嘅deadline同活動要趕課請假)

問多啲既目的都係希望了解返學生嘅狀況同期望,始終大家素未謀面,你又唔清楚學生嘅需要就好難針對性去提供返佢地想要嘅野,大家溝通得好,課堂自然會順暢好多啦!

2.準備教材

第一次補習 - Joint-Us 雞精書
如果學生冇話自備教材,你就要準備好教材㗎啦!

了解咗學生嘅需要之後,就緊係要好好準備第一堂要用嘅野啦!如果學生係自備教材既嘅話,咁你就可以上網重溫返一啲相應課題嘅資料,去確保所有概念都有記憶嘅,唔怕到時比學生問到口啞啞啦!同時你都可以考慮準備少少extra嘅筆記,當學生嘅教材用晒嘅時候都有嘢係手做下,以備不時之需!

如果家長或學生要求你準備教材嘅話,咁你一定要利申返自己未必真係好準確對到學生嘅考試範圍,雖然係同一課,但唔同學校針對唔同嘅野同嘅難度都有唔同,唔同嘅學生都有唔同進度,除咗事前你要了解學生嘅需要,準備教材你都切記要準備多啲好過少,甚至準備埋後一課前一課,咁樣就會比到家長或者學生你可信、有備而來嘅感覺。

3.準時到達

第一次補習 - timing is everything
準時到達補習場所,可以令你嘅第一印象加分。

呢層唔洗講啦!守時是美德,補習嘅第一堂緊係要提前/準時去到補習地方,咁樣做可以留一個好嘅印象比家長同學生,話比佢地聽你係一個有責任心嘅人,咁佢地就會搵你長補嘅機會都會增大!

另外,出門時間方面預鬆少少,尤其是去你唔熟悉嘅地方,即使有Google Map都可能要自己花啲時間去搵,如果早到左嘅話又可以感覺輕鬆啲,唔洗急急忙忙上到去,搞到緊張得滯咩都唔記得晒。就好似考DSE個陣你都會早少少到考場熟習下,適應下個環境啦係咪先!早咗到,熱下身、放鬆下個人,咁一開波成個人都醒啲,自信心返晒黎啦!

 

私補首堂

4.唔好講太多同課堂無關既野

第一次補習 - 我建議你少一點說些無用的話
補習首堂少一點說些無用的說話,先教好書先啦。 (圖片來源:蘋果日報)

雖然話私補要同學生打好關係,可以傾多少少閒偈,但係唔建議係第一堂就咁樣做,因為始終大家未建立到信任嘅時候,如果你經常偏離課堂嘅主題,有機會令學生或者家長覺得你鐘意吹水多過教書,認為你教唔到啲咩。你當然可以用輕鬆少少嘅語言去帶動成個氣氛,但係就唔好過份講到其他興趣、時事、八卦野、加IG等等嘅嘢。

你要記住,首堂嘅目標係比對方睇到你嘅專業,證明你係有能力去教學,而且係有熱誠,切忌hea教吹水!建立關係嘅野等你同學生有咗互相信任之後再慢慢了解多啲都未遲,最緊要人地試完你堂覺得你有料,教到嘢,繼續搵你補咁先有用㗎嘛!學曾鈺成話齋:「我建議你少一點說些無用的話。」。

 

5.幽默嘅你切忌隨便同學生開玩笑

小編自己就有一段經歷想分享下,第一次去上堂個陣,見個學生好似幾玩得又幾過癮,跟住就隱隱約約串下佢,好似係「你確認你而家嘅水平係DSE考生?」咁上下嘅程度,點知個學生就突然個樣有少少真嬲,講左句:「你唔好咁mean得唔得呀」,之後就黑面,有啲灰心,又有啲嬲咁,成堂個氣氛就變得尷尬咗,搞到我都幾唔好意思。

第一次補習 - 每個人都有一個地方是特別脆弱的
每個人都有自己嘅難言之隱,唔好係未熟悉對方嘅時候亂咁同人開玩笑。(圖片來源:賭俠)

雖然個學生最尾都有搵返我長補,但係呢個故事教識我真係唔好隨便同人開玩笑,因為每個人都有啲地方係特別脆弱而你又唔知,尤其是第一堂個陣,所以真係唔好亂咁去串人,即使你覺得個樣嘢好minor,等你地真係做咗friend先再講都未遲,就好似《賭俠》入面嘅達叔所講:「每個人都有啲地方係特別脆弱既,而呀叔啱啱就係正個頭到」,一定要慎言。

 

6.切記要有禮貌

有禮貌係非常重要,尤其是當對方未接觸過你嘅話,禮貌係可以令佢對留下一個好好嘅印象。一見面一定要打招呼,走個陣用好啲嘅語氣去請對方比一啲feedback你,約埋下一堂時間,同埋講拜拜,唔好急急腳走咗去,比人感受到你係好caring同有heart。

第一次補習 - Hat Off
有禮貌雖然係基本,但唔少導師都好似忽略左。

而且,有禮貌除咗比人感覺你係一個有修養、易相處同友善嘅人之外,仲可以比對方感受到你嘅認真同埋對教學嘅熱誠。試問如果你搵一個幫你手做野,個個人又粗魯又冇禮貌,你都會覺得佢好似唔係好想做咁啦(更甚嘅係,你唔會想受佢氣),所以一定要以禮待人!

 

7.準備適量嘅功課份量比學生做返

第一次補習 - Homework and stress
適量既功課,有助學生吸收得更好。

比功課學生做其實有好多好處,以下就簡介咗三點。

第一,學生有功課做可以令佢地將學過嘅野即刻實踐返,如果你上堂教到嘢,佢地再做多次,就會鞏固到記憶,自然就會將你教嘅嘢更有效入到腦。

第二,可以比到一個印象對方,你唔係教完就算,你教完仲會有嘢比佢地做,家長聽到一定會好開心,因為佢地最鐘意就係比多啲功課,感覺好似實在啲。

第三,可以更加了解學生嘅性格,調整教學方針,你可以從學生係交功課嘅態度睇到佢地嘅性格,知己知彼先可以百戰百勝。有心同勤力嘅學生多數會按時完成功課比你check,咁你就可以放心去教同assign功課比佢地做;對於乜都冇做嘅學生,你就應該諗多啲方法令佢地主動完成返啲功課,幫佢地搵出要讀書嘅原因,激勵佢地,例如同佢地講下點解要讀書、點解要做功課、做功課嘅目的係咩,有需要甚至可以搵家長出馬,請家長督促佢下堂前做晒功課,都有助加速返上堂嘅節奏。

 

私補首堂後提醒

8.問返學生嘅feedback

第一次補習 - The feedback loop
Feedback可以量度學生對你嘅感受,可以要求佢地講得直接啲。

如果你第一堂準備得唔係咁好,上堂嘅時候有啲蝦碌,課堂時間又控制得唔係咁好,第一印象當然會打咗折扣,但係過去咗既嘢已經返唔到轉頭,而家唯一可以做嘅就係下一堂表現得好啲。

你可以做嘅就係問返佢哋意見先,等你知道可以做啲咩令到課堂質素上升(教得太快?教得太淺?功課太少?解得唔夠清晰?),你下堂就可以因應住呢啲comment調整返你嘅策略。如果我係學生見到你咁有心去提高教學質素,我都會即刻對你改觀嫁!

 

9.同家長夾得唔係好稱心,主動同中介聯絡

第一次補習 - Smiling emoji
作為導師同學生之間嘅橋樑,Tutor Circle 尋補歡迎導師係遇到困難時打比我地呻。

最後一點,有時你可能已經盡咗力,但係對方仍然對你多多批評,儘管你已經落力為學生好,但依然得不到分數,你就可以搵返相應嘅中介去講返成件事,未必係你唔啱㗎嘛!

Tutor Circle 尋補觀迎導師同我地申訴(或者呻),無論係教學上或非教學上遇到任何問題,如果你唔想直接同家長講出你嘅問題,都可以透過我哋將你嘅意見反映返比家長或學生知道。除咗幫你地搵到學生之外,我地都十分重視導師嘅權益,如果遇上不公平或不合理對待,我地一定會施以援手!

 

總結

以上就歸納咗私補老師第一堂要注意嘅地方,私補要補得好從來都唔容易,仲要挽留到家長學生嘅心,希望呢篇文章幫助到你去準備課堂,如果有任何意見都歡迎係下面留低comment,我地一定會比返答覆你地!

 

此文章純屬 Blogger 個人分享,並不代表本網誌立場。

 

【延伸閱讀】失眠 解決 – 失眠點算好?10個簡單有效解決方法

【延伸閱讀】present 技巧 – 令Present成功嘅技巧大揭秘!

 

想追返學校進度?Tutor Circle尋補有超過10,000個三大導師,即日幫你搵一個合適既導師!

想搵 一個合適既私補老師

 

DSE讀得咁辛苦,想活用知識黎賺下外快?

想搵 好多好多私補學生

緊貼尋補 BlogFacebook  Instagram,尋補?Tutor Circle

 

Z世代 修辭手法 Ocamp
英文補習 上莊 中文補習 議論文
slp smaple 補習網 數學補習
大學五件事 綜合格式

 

分享俾你嘅朋友喇!

Comments

comments