韓流大熱,韓國迅速飆升成為左香港年輕人最愛嘅旅遊地點之一,甚至有啲人一年飛幾轉韓國,泡菜國簡直就好似家鄉一樣啊!之但係韓國嘅物價都唔低架,洗費一啲都唔平,拍得住香港。未儲夠錢又心郁郁想飛轉首爾「返鄉下」,咁就要搵下方法節省下開支喇!以下就等我為大家推薦幾間平、靚、正嘅地道맛집(美食店),Tutor Circle尋補同大家一齊窮遊韓國!

 

1. 無限鰻牛/無限場所 (무한장소)

韓燒除左肉之外,韓國人都好中意食鰻魚(장어)架!係炭火上面燒鰻魚,燒到金黃色,外脆內軟,同日式蒲燒鰻魚口感完全唔同。鰻魚有好高嘅營養價值,係韓國係視為「補身」嘅食品。呢間店提供鰻魚同埋牛肉任食,而且仲冇限時tim,可以慢慢食到夠為止,而每個人都只係KRW19900,即係大約HKD140!

 

地址:於首爾有多間分店

窮遊 韓國

(圖片來源自網上)

 

2. 姨母家王蔥餅 (이모네왕파전)

蔥餅係香港比較少有,就算有都唔係專賣蔥餅嘅店,但「餅」呢樣食物係韓國都算幾具代表性,而韓國人呢就最中意係落雨嘅日子食蔥餅,大家又知唔知點解呢?係因為煎蔥餅嘅「嗞嗞」聲同雨聲好似,所以韓國人就特別中意係落雨天一邊食蔥餅,一邊飲馬格利酒(막걸리)享受下悠閒嘅時光。呢間蔥餅雖然唔近遊客區,但真係十分之抵食!其中最推介嘅就係G Set,包括海鮮蔥餅一大個、芝士雞蛋卷、辣炒年糕、芝士粟米同埋一枝汽水,都只係KRW23000(約HKD161),我試過5個人去食都食到好飽架!

 

地址:서울 동대문구 휘경1동 334-85 (首爾市東大門區徽慶1洞334-85)

電話:02-959-8318

窮遊 韓國

 

3. 弘益醬蟹 (홍익게장)

醬油蟹簡直係韓國食品裡面嘅名物,佢有個花名,叫做「白飯小偷」,因為佢實在太送飯喇,令人好容易忍唔住就食左幾碗飯落肚。但係韓國醬油蟹絕對唔係一個低消費嘅食品,想嚐鮮一下又唔想咁貴,可以試下呢間弘益醬蟹,最平只需要KRW15900(約HKD112)就可以無限任食醬油蟹喇!雖然質素就冇咁高,但平平地想試下醬油蟹係咩一回事嘅朋友就十分適合喇!而且地點就腳,就係弘大,所以都好受旅客歡迎架!

 

地址:서울 마포구 성산동 232-12 (首爾麻浦區城山洞232-12)

電話:02-323-1112

窮遊 韓國

 

4. 八八海鮮鍋 (팔팔해물탕)

首爾雖然唔係沿海城市,但一樣有新鮮嘅海鮮食!呢間餐廳專做海鮮鍋,一拎上枱滿滿嘅海鮮堆埋一齊,啲鮑魚同龍蝦仲識郁住同你打招呼tim呀,睇下幾咁新鮮!中份(2-3人)嘅就KRW60000(約HKD420),大份(4-5人)就KRW78000(約HKD546),平均一個人百幾蚊就食到最新鮮最正嘅海鮮,香港邊度搵丫!不過一樣都係唔太近旅遊區,但唔需要擔心,果度有中文menu同埋識講中文嘅阿豬媽店員,溝通冇難度!

 

地址:서울시 동작구 신대방2동 375-21 (首爾銅雀區新大方第2洞375-21)

電話:02-817-2789

窮遊 韓國

以上嘅推介我全部都有幫大家試過先介紹架!黎緊仲會有更多暢遊韓國嘅資訊~記住要繼續留意喇!

 

【延伸閱讀】學韓文 | 韓流教室 – 韓國潮語識幾多?

【延伸閱讀】那些年,你或許顧著遊歷而沒為意的系列  – 韓國篇

 

此文章純屬 Blogger 個人分享,並不代表本網誌立場。

 

想追返學校進度?Tutor Circle尋補有超過10,000個三大導師,即日幫你搵一個合適既導師!

想搵 一個合適既私補老師

 

DSE讀得咁辛苦,想活用知識黎賺下外快?

想搵 好多好多私補學生

緊貼尋補 BlogFacebook  Instagram,尋補?Tutor Circle

分享俾你嘅朋友喇!

Comments

comments