中文卷四既小組討論除左內容同埋論述能力之外,其實都有各種基本說話要注意嘅技巧同細節,只要好好把握每個微小嘅位,刻意練習,就可以助你係中文說話考試立於不敗之地啦!Tutor Circle尋補今日就同大家講下中文小組討論既貼士,希望幫助到各位應付DSE同校內試!

1.攞足印象分

小組討論技巧 - 中文oral
印象分對口試都非常重要,老師都係人,人都主觀既。

中文小組討論考試嘅分數「一錘定音」,考官個一下點諗你就會點俾分。而當佢地聽過十幾廿萬組之後,佢地真係無心機再逐粒字聽你講得岩唔岩,你嘅儀容、態度、坐姿、笑容,呢啲細微到你考試一緊張就未必再留意嘅野,就好影響考官俾你嘅印象分。

簡單而言就係,佢對你好感多啲,只要你講野符合邏輯無大錯,俾分都自然鬆手啲,所以最好由你踏入考試室個一刻,都保持微笑(唔好咁假呀下),對考官點一點頭,展示你嘅鬆容同自信!坐低嘅時候,唔好翹腳,唔好腿張開,正常合埋對脾就好了。

坐直啲個人,考試途中唔好轉筆,講野都唔好攞住枝筆係到指,要抄野先攞筆,自己講野個時唔好死望住自己張紙,都唔好拿實張紙,望多啲組員同考官,咁就可以保持眼神交流之外,都自己做多啲手勢幫助表達你嘅言論同投入!

聽人講野個時雙手握住放係枱面,唔好放大脾,唔好俾個考官以為你好驚驚捉實自己條褲,另外可以稍微側身,配合埋輕輕點頭,示意你真係有聽人講野!至於露肉、頭髮遮住塊面個啲,咁你都唔記得就抵打啦!

 

2.十分鐘點準備好?

小組討論技巧 - 中文
係短時間內一定要準備到最有價值既野,先至可以係之後既考試取得優勢!

當然首先要介定到你係咩題型先。共識?立場?咁先可以介定到你地嘅討論係要往咩方向發展(最尾係咪要有共識),然後就要介定翻題目重要字眼,例如係「最」「比較」呢啲,自己注意到之外都可以捉下人地有無錯,既然話得係討論,就咁最好有唔同意見先多野講啦,但你又唔可以排除有啲豬隊友唔識轉彎,幾個人都講埋同一個立場。

所以聰明嘅你,係準備嘅嘅時候揀定自己想講嘅立場以外,都花小小時間準備定其他立場,一黎有位俾你轉軚,二黎可以諗定點樣反駁人地嘅講法,從而論證自己係有說服力啲。準備過程記得諗定兩三個例子去support自己嘅論點,如果唔係,就算你發左十次言都只係空口講白話。

最後記住留翻1至2分鐘,俾自己整理一下要講咩,係心裡面默默地練習下,等準備過嘅野可以順順利利,君臨天下咁幫自己攞十足嘅分啲。

中文說話有好多注意事項考生冇詳細睇清楚,有時仲會衰左都唔知!

想知多啲 中文說話卷須知

3.發言結構

其實不論係首輪發言定之後嘅發言,結構都好類近,要清晰易明!首輪發言切記要打!招!呼!然後表明一下你對題目嘅立場,提出一個論點就夠,因為你無時間講多過一個,仲要留翻啲彈藥後場用!然後輕輕解釋,配合一個例子,再小總結。

一分鐘應該就到了!後場嘅發言結構就有多啲配搭,如果你係想反證論點,首先quote翻人地講過啲咩,然後禮貌地指出人地嘅言論有咩問題,最重要個到黎啦,就係要重申自己嘅論點,仲有例子可以用就講埋,話俾人聽你岩啲。

 

4.拋書包大忌

大家平時睇新聞都睇得多話啲學生亂用古今名言(e.g. 提出周星馳話人無夢想同咸魚無分别…)例子同名言呢,就真係唔好亂用,書包都唔好亂拋,話晒個考官都係中文老師〜講錯左除左削弱說服力之外,就真係名副其實自己衝出黎!

 

總結

中文討論要考得高分,除左要你本身有推論能力之外,同埋要注意考試既細節:

  • 整潔儀容
  • 認真、積極、友善態度
  • 善用10分鐘準備時間
  • 有條理既發言結構
  • 引用正確

當你係每個細節都比其他人做多一步,諗得多少少,慢慢就會累積成為你係試場上既優勢,希望大家睇完呢篇文都會學到少少小組討論既技巧,期待係Tutor Circle尋補Blog再同你見面!

 

【延伸閱讀】中文綜合 – 做好準備,便能輕鬆取得高分的分卷

【延伸閱讀】DSE冇難度,全因我有特別的…5**「中文說話」技巧

 

此文章純屬 Blogger 個人分享,並不代表本網誌立場。

 

想追返學校進度?Tutor Circle尋補有超過10,000個三大導師,即日幫你搵一個合適既導師!

想搵 一個合適既私補老師

 

DSE讀得咁辛苦,想活用知識黎賺下外快?

想搵 好多好多私補學生

緊貼尋補 BlogFacebook  Instagram,尋補?Tutor Circle

 

Z世代 修辭手法 Ocamp
英文補習 上莊 中文補習 議論文
slp smaple 補習網 數學補習
大學五件事 綜合格式

 

分享俾你嘅朋友喇!

Comments

comments