中學生可以做嘅暑期工選擇其實並唔多,始終返工時間唔長,唔似大學生開左sem都可以返part time,中學暑假又短,要搵工返都幾頭痕!所以,今次Tutor Circle 尋補就為大家介紹一下一啲大部份會請中學生嘅工,等大家可以參考一下,等各位學生係放假既時候都有方向去搵part time暑期工。

1. 侍應

呢個唔洗我多講,飲食業係最容易請中學生嘅。因為餐廳通常都需要呢啲短期人手,只要表現得對飲食行業好有興趣,相信都好大機會請!比個小貼士大家,通常侍應請人都唔會放招聘廣告係網上,因為餐廳冇呢個時間去做,所以直接問間餐廳或者睇下門外有冇寫住請人,係個十分好嘅方法。千祈唔好以為上網就搵得到咁多工呀!另外,都唔好兩三個人一齊去見工,咁樣會比到主管一個唔認真,似係黎玩嘅印象。

中學生暑期工 - waiter
飲食業長期唔夠人手,撞正暑假多左人消費就更加需要員工,所以即使係返短期嘅中學生都會請。

 

2. 倉務員

倉務員通常都比侍應高人工,常見嘅倉務員人工時薪介乎HKD$50-100,當然啦,人工高啲,工作量亦自然大啲,倉務員通常都要出賣大量勞力,常見嘅倉務就係機場果啲。機場貨運需要好多嘅人手,所以大家可以去打聽一下。要留意嘅地方係,倉務通常都只係請夠18歲嘅人士,唔夠18歲好多時都唔會請架。

中學生暑期工 - 倉務
倉務員要求大量體力勞動,通常都淨係請男仔同埋夠18歲嘅同學。

3.文員

文員對比以上工種既工作量當然無咁多啦,大部分都係請人返黎入下資料同做下打雜,有時候可能幫老細做下跑腿咁,雖然有冷氣嘆,不過人工相對地較低。時薪介乎HKD$40-55。除此之外,兼職或者暑期工嘅文員競爭好大,而且好少請人。想做文員嘅大家就要mon實邊間公司請人喇!

中學生暑期工 - clerk
文員係office有冷氣嘆又有得坐,係好多中學生都想返嘅part time,但相對黎講比較少請人。

 

4.Sales

Sales亦都係一個唔錯嘅暑期工選擇,佢地請人嘅容易度同侍應有得fight!因為售貨員都係長期缺人嘅關係,所以,唔中意做侍應嘅可以考慮一下!人工方面,sales嘅人工其實都唔錯架,介乎HKD$40-80,都係視乎你邊間公司,做到名牌sales真係HKD$100都唔出奇架。此外,Sales多數都有佣金分,小編都做過下相機Sales,人工再加佣其實對學生嚟講真係唔錯架!

中學生暑期工 - sales
唔想做飲食業嘅同學仔都可以考慮下做sales,都好易請人。

5.補習導師

你可能會問,唔係大學生先至可以幫人補習咩?起碼都要有張DSE成績表呀?如果你係中學既成績唔錯,你一樣可以幫小學或者初中既學生補習,而唔少補習社都會請高中學生去協助功課輔導班,主要都係幫佢地完成功課,對下答案,同睇住佢地!

中學生暑期工 - 補習老師
補習老師並唔係大學生既專利,中學生一樣可以做!

 

6. 臨時演員

周星馳係喜劇之王入面,都係由臨時演員(茄呢啡)開始做起,對演藝行業有興趣又想賺下外快?臨時演員就啱晒你。「精神啲,臨時演員都係演員」,有份參與電影戲劇既拍攝,仲有機會係大銀幕見到你,仲唔考慮下?坊間有好多炒散WhatsApp group或Facebook group都會張貼告示請臨時演員,每次都有唔同既需要(身高、肥瘦、性別、外貌等等),不妨自己去留意下。

中學生暑期工 - 喜劇之王對白
臨時演員下一步隨時一躍而上成為專業演員,下一個星爺可能就係你。

 

7.問卷調查員/派傳單

唔少公司都話請問卷調查員去訪問返客戶對公司既意見,係街邊請路人幫佢地填資料,之後再根據呢啲資料進行銷售;無論係街上面派傳單定係叫人填問卷,都係需要日曬雨淋,而且要遭受途人既白眼,如果你想磨煉下自己既意志力,一試無妨!

中學生暑期工 - 派傳單
派傳單雖然辛苦,但人工會相對高少少,而且可以磨煉自己。

 

總結

今次中學生暑期工有咩揀就去到呢到喇,大家決定好自己想做咩工未呢?無論做咩工都好,最緊要安全第一,同埋要睇清楚啲合同先好簽約呀!比人呃就得不償失喇!

 

【延伸閱讀】面試技巧自我介紹 工作篇

【延伸閱讀】CV Resume分別 – 查完字典都係叫履歷,究竟有咩唔同?

 

此文章純屬 Blogger 個人分享,並不代表本網誌立場。

 

想追返學校進度?Tutor Circle尋補有超過10,000個三大導師,即日幫你搵一個合適既導師!

想搵 一個合適既私補老師

 

DSE讀得咁辛苦,想活用知識黎賺下外快?

想搵 好多好多私補學生

緊貼尋補 BlogFacebook  Instagram,尋補?Tutor Circle

 

Z世代 修辭手法 Ocamp
英文補習 上莊 中文補習 議論文
slp smaple 補習網 數學補習
大學五件事 綜合格式

 

分享俾你嘅朋友喇!

Comments

comments