上莊 ,大學五件事之一,亦即係指擔任學會內閣嘅幹事,為學會嘅members服務,定期籌備活動及聚會等等。有人話呢件事好熱血,係可以留低啲莊員嘅回憶;亦有人話上莊根本係嘥時間,攞錢貼難受,仲話後悔上莊。Tutor Circle 尋補 話你知上莊究竟為左啲乜,希望你可以諗清楚先再決定上莊,唔好虛度光陰。

1. 識返班老死

首先,上完莊得到最難能可貴嘅一定係一班莊員。一年莊期流流長,對得最多嘅就係成班莊員。一齊諗橋、一齊prep function、一齊食飯休息,見莊員嘅時間真係分分鐘比見屋企人仲要多。佢地係一班會陪住你頹、嬲、夜晚捱眼瞓係common prep function,最後同你一齊分享喜悅嘅人。正因為一齊經歷左好多難關,落咗莊你哋依然會係最好嘅朋友、一世嘅兄弟

上莊 - 莊員
一齊捱過辛苦嘅時刻,莊員分分鐘就係你一世嘅好朋友。

(圖片轉自網絡)

 

2. 學野

第二,正如上面都講過,上莊,就係去搞好多唔同嘅活動去比members參加。由諗活動、準備,到籌辦成個過程中,好多實戰嘅經驗都係書本上學唔到。又例如人手分配、時間、資源利用、組織能力、領導才能……呢啲現今社會好睇重既Soft skills都可以透過上莊嘅一年莊期培養到,對將來出去做野都有一定嘅幫助架。

上莊 - soft skills
上莊賺取實戰經驗,有好多soft skills係上堂學唔到嘅。
(圖片轉自網絡)

 

3. 識人

此外,上莊有好多機會可以識到唔同嘅人,擴闊自己嘅社交圈子。除左莊員、Members之外,仲有好多可以識到其他U / soc嘅人嘅機會,例如出Inaug (就職典禮),搞joint u活動等等,擴闊社交圈子。正所謂出外靠朋友,識多個人有咩事上黎都有多個幫手呀嘛!

上莊 - inaug
舉辦Inaug(就職典禮)嘅時候會邀請埋其他U嘅莊黎參加,可以認識多啲人。
(圖片轉自網絡)

 

4.威

點解上莊呀?因為上莊威囉,疊馬囉!上左莊之後,身邊就會長期有一班莊員,去到大學每一個角落都可以恃勢凌人,人多呀嘛!Inaug個陣可以成班人著住套老西去chur莊務,日日唔訓教去dem beat,去庇護,去搞活動。上到Facebook、Instagram又可以影好多一大堆人既相曬馬。點解要咁做?威囉!可以話比其他人知,你有幾yo,玩得有幾癲,係學校隻手遮天,仲唔威呀?

上莊 - 陳浩南
上莊可以係一件好威既事,同時都可以一件好off既事。

 

5.自chur

「佛系」呢個terms反映左唔少人既心態,對安逸、穩定既生活既渴求。但係,如果你想上莊,仲要上chur莊,咁你一定好鐘意自chur!自chur,語下之義,就係要自己chur自己,將人類既潛能迫發出黎,例如連續48個鐘唔訓教去做莊務,一個禮拜每日只係訓2至3個鐘,證明比世人睇俄羅斯唔訓教實驗係可行既!有人就話,你都傻既,我留返啲時間訓教打機睇YouTube好過啦。錯啦,自chur係堪稱本世紀最強既soft skill,如果你夠chur,天底下會有一樣野難到你?

上莊 - 睡眠實驗
傳聞話俄羅斯眠實驗將冇訓教一個月既人全部變成怪物。

6.攞宿分

點解上莊個陣見到有啲好似好頹,明明冇乜心機做莊務,又唔係特別想玩既人都黎左上莊既?佢地極有可能就係為左宿分而黎!唔想上莊但又上莊,呢種極不負責任既想法令到好多莊去到真正上任既時候出現退莊潮,因為去到真係要做野個陣就好多人受唔住每日捱更抵野去做一啲自己唔想做既野!

上莊 - Hall
上莊為左呃宿分呢種行為真係唔要得!

 

7.出pool

老實講呀,入到大學,大家有各自既時間表,又有各自既圈子,冇乜機會好似中學咁同一班人成日見面,除非你地真係好投契,如果唔係都幾難熟落到,仲點出pool呀!上莊就正正比左一個機會你可以同一班人成日見,見得多自然熟,一熟你咪有機會囉!根據非正式統計,唔少人係ocamp同上莊既時候出pool,而乜都唔玩就出到pool既人係接近0%呀!

上莊 - 馮盈盈
如果你男神或者女神係同你上埋同一支莊,咁你距離成功就近左一大步啦!

你以為肯玩就代表出到pool?大把人玩完ocamp都係單身咋!以下有篇讀者投稿,親述玩ocamp既經歷,建議讀者準備左紙巾先好click入執。

想知多啲 ocamp單身

 

睇下【後生仔傾下偈】入面既麥明詩同馮盈盈點睇上莊呢樣野!

 

總結

上莊的而且確係吃力不討好嘅功夫,做得好未必有人讚、做得唔好卻係有大把人插;亦有好多你需要權衡不同團體嘅利益關係,但係回頭一睇,係呢一年入面確實會成長唔少,落咗莊之後,呢段咁辛苦嘅時光依然會係你最歷歷在目、最青春、最熱血嘅回憶!

 

【延伸閱讀】大學五件事 – 係咪要做齊先叫讀過U?

【延伸閱讀】住hall – 物理與心理上嘅住呵準備

 

 

此文章純屬 Blogger 個人分享,並不代表本網誌立場。

 

想追返學校進度?Tutor Circle尋補有超過10,000個三大導師,即日幫你搵一個合適既導師!

想找 一名合適的家教老師

 

DSE讀得咁辛苦,想活用知識黎賺下外快?

想找 很多家教學生

緊貼尋補 BlogFacebook  Instagram,尋補?Tutor Circle

 

Z世代 修辭手法 Ocamp
英文補習 上莊 中文補習 議論文
slp smaple 補習網 數學補習
大學五件事 綜合格式

 

分享俾你嘅朋友喇!

Comments

comments